काठमाडौँ - नयाँ वर्ष २०८१ सालको अवसर पारेर नयाँ नेपाली  फिल्म   ‘भिजिट भिसा’ निर्माणको घोषणा गरिएको छ । 

छत्रेश्वरी म्यानेजमेन्टको ब्यानरमा निर्माण हुने पारिवारिक सोसल ड्रामामा कथा निर्माण हुने फिल्मको थिम पोस्टर सार्वजनिक गर्दै निर्माण घोषणा गरिएको हो । सार्वजनिक पोस्टरमा पहाडको खोँच, खोँचमा कुहिरो, हिमाली क्षेत्रमा पाइने बोटबिरुवाले हिमाली क्षेत्रको सङ्केत गरेको छ । पोस्टरमा प्राचीन बस्ती देखाइएको छ। बस्तीका घर पुराना भइसकेका छन् । जीर्ण बनेका घर लड्न ठिक्क परेजस्ता देखिन्छन् । ढुङ्गाको छानो भएका बाक्लै घर तीन तलेसम्मका र सिँढी देखिन्छ । यसले कुनै समयको संवृद्ध बस्ती भएको पोस्टरले सङ्केत गरेको छ ।

फिल्मका निर्माता टोपेन्द्र विष्टले फिल्मले पछिल्लो समय लर्को लागेर विदेश जाने प्रवृत्तिलाई देखाउने बताए । मोती विष्ट प्रस्तुतकर्ता रहेको यो फिल्मको निर्माता टोपेन्द्र विष्ट हुन् । बिराज विष्टको कथा रहने फिल्ममा यम थापाको पटकथा रहेको छ । बिराजले यसअघि फिल्म ‘बुलाकी’ निर्माण गरेका थिए । यो फिल्मले चलचित्र विकास बोर्डले आयोजना गरेको ‘राष्ट्रिय चलचित्र पुरस्कार २०८०’मा विशेष फिल्मको अवार्ड समेत पाएको थियो ।