काठमाडौंँ - अभिनेता विराज भट्टको निर्माण तथा निर्देशन रहेको फिल्म ‘१२ गाउँ’ को टिजर सार्वजनिक भएको छ । 

दशैंको फूलपाति अर्थात् असोज २४ गतेबाट प्रदर्शनको तयारीमा रहेको फिल्मले शुक्रबार एक कार्यक्रम गर्दै टिजर रिलिज गरिएको हो । १ मिनेट २१ सेकेन्ड लामो टिजरमा डेव्यु अभिनेता समीर भट्टलाई एक्सन अवतारमा प्रस्तुत गरिएको छ ।

फिल्मबाट समीर भट्टले अभिनेताको रुपमा डेब्यु गर्दैछन् । भारतमा बसेर मार्सल आर्ट र अभिनय सिकेका समीर अभिनेथा बिराज भट्टका छोरा हुन् । ‘१२ गाउँ’ मा अहिलेसम्म नेपाली फिल्ममा नभएको एक्सन राखिएको निर्देशक भट्टले बताए ।

फिल्मबाट दुई पूर्वमिस नेपाल इन्टरनेशनल न्यान्सी खड्का र मोडल सनिशा भट्टराईले पनि अभिनेत्रीको रुपमा डेव्यु गरेका छन् । विराज, समीर, न्यान्सी र सनिशाका अलवा मुरलीधर, कनिज कोइराला, नरेन खड्का, दीया मास्के, कृष्ण भट्ट, सोनु चन्द्रपाल, कालु राना, अर्जुनजंग शाही, भिष्म जोशी, शुलेमान शंकर ९इकु०, तारा शर्मा, किशोर भट्ट, सन्तोष सरकार र स्टन्ट शिल्भाको अभिनय फिल्ममा रहेको छ ।

विराज भट्ट फिल्म पोडक्सन प्रस्तुतिमा निर्माण भएको फिल्ममा अर्जुन पोखरेल र निरजको संगीत, रामजी लामिछाने, सुनील क्षेत्री र कविराज गहतराजको कोरियोग्राफी तथा प्रवीन केएल र भुपेन्द्र अधिकारीको सम्पादन छ । विराज स्वयम्को कथा र सन्तोष सरकारको पटकथा तथा संवाद लेखन फिल्ममा छ ।

महेश पौडेल छायाङ्कन रहेको फिल्म काठमाडौँ, ललितपुर, वीरगञ्ज र हेटौँडामा छायाङ्कन गरिएको छ । फिल्मको वितरण काफिया फिल्मस् र कुवेर सिने डिष्ट्रिव्युसनले गर्नेछ ।