काठमाडौं - अखिल (क्रान्तिकारी) का विद्यार्थीले माउ पार्टी नेकपा (माओवादी केन्द्र ) भित्रको असमान सेवा, सुविधा वितरणको विरोधमा अभियान सुरु गरेका छन् । उनीहरूको मुख्य असन्तुष्टि भनेको एउटै परिवारमा मात्र केन्द्रित भई राजकीय र पार्टीका स्रोत तथा सुविधाहरू लिइनु हो ।

विद्यार्थीहरुको मुख्य असन्तुष्टि पार्टी अध्यक्ष पुष्पकमल दाहालको परिवारप्रति रहेको छ । जसले राज्य र पार्टीको प्रमुख अवसरहरूमा लगातार पहुँच राख्दै आएको छ ।

यसबाहेक,  धेरै पटक मन्त्रीसहित महत्वपूर्ण पदमा नियुक्त भएका  केही उपह.महाचिव लगायतका नेताहरुप्रति पनि विद्यार्थीृहरुको असन्तुष्टि रहेको छ ।  शक्तिकाे दुरूपयाेग गर्दै  जनार्दन शर्मा, शक्तिवहादुर बस्नेत र वर्षमान पुनले

शक्ति र स्रोतको पहुँचमा सिण्डिकेटजस्तो अवस्था सिर्जना भएको देखिन्छ ।

अखिल (क्रान्तिकारी) का विद्यार्थीहरूले माओवादी केन्द्रमा भएको यो सिण्डिकेट प्रणालीलाई भौतिक उत्प्रेरणा र अवसर लिने प्रवृत्ति भन्दै आलोचना गरेका छन् । पार्टीको ३७ वर्ष लामो नेतृत्वमा रहेका पुष्पकमल दाहालले पछिल्लो समयमा आफ्नो नेतृत्वमा पार्टी अस्तित्व नै जीर्ण हुँदै गए पनि शक्ति र स्रोतमा उनको पकड अझै प्रबल छ ।

सबैभन्दा चाखलाग्दो कुरा के छ भने अध्यक्ष पुष्पकमल दाहाल प्रचण्डले विद्यार्थी सम्मेलनमा उमेर हदको प्रस्ताव गरेपछि यो अभियान सुरु भएको हो । विद्यार्थीहरूले त्यसको प्रतिक्रियामा सामाजिक सञ्जालमार्फत उमेरमा मात्र किन अवसरमा पनि हद लगाइनुपर्छ भन्दै अध्यक्ष प्रचण्ड र अन्य पटकपटक अवसर लिने नेताहरूको विरुद्ध अभियान सुरु गरेका छन् ।

विद्यार्थीहरूको सामाजिक सञ्जालमा चलाइएको यो अभियान पार्टीभित्रको असमानताप्रति जागरुकता ल्याउने मात्र नभई नेतृत्वमा रहेका पुराना अनुहारहरूको निरन्तर प्रभुत्वको विरोधमा हो । यस्तो अभियानले पार्टीलाई आन्तरिक सुधारतर्फ उन्मुख गर्न थप दबाब सिर्जना गर्न सक्छ ।

माओवादी केन्द्रभित्र लामो समयदेखि देखिँदै आएको परिवारवादी, सिण्डिकेट शैलीको नेतृत्वलाई खुला चुनौती दिने विद्यार्थीहरूको महत्वपूर्ण प्रयास हो । यसले पार्टीको आन्तरिक राजनीतिमा असन्तोषको गहिरो तहलाई उजागर पनि उजागर गरेको छ । जहाँ नेता र तिनका परिवारहरूले राज्य र पार्टी स्रोतमा एकाधिकार जमाउँदै आएका छन् । विद्यार्थीहरुको अभियानले सबैभन्दा सकस अध्यक्ष प्रचण्ड र उनको गुटलाई परेको बताइन्छ । यो गुटको कारण पार्टीको शाख गिर्दै गएको र आगामी चुनावमा झनै खस्किने विद्यार्थी नेताहरु बताउँछन् । यही गुटका कारण आधारभूत वर्गका जनतासँग पार्टीको सम्बन्ध विच्छेद हुँदै गएको माओवादी नेताहरुको भनाइ रहेको छ ।