काठमाडौं- सानिगाड हाइड्रो लिमिटेडले आज चैत ८ गतेदेखि आईपीओ बिक्री खुला गरेको छ। कम्पनीले पहिलो चरणमा आयोजना प्रभावित क्षेत्रका स्थानीय बासिन्दा र वैदेशिक रोजगारीमा रहेका नेपालीहरूलाई लक्षित गर्दै सेयर निष्काशन गरेको हो।

कम्पनीले  जारी पूँजीको २ अर्ब ८५ करोड रुपैयाँको ३० प्रतिशत बराबरको ८५ लाख ५० हजार कित्ता सेयर सार्वजनिक गर्न स्वीकृति पाएको थियो। यसमध्ये पहिलो चरणमा  कुल मूल्य २८ करोड ५० लाख रुपैयाँ बराबरको २८ लाख ५० हजार कित्ता सेयर आयोजना प्रभावित क्षेत्रका बासिन्दाका लागि छुट्याएको छ । 

यो सेयर अति प्रभावित क्षेत्रअन्तर्गत बझाङ जिल्लाको बुंगल नगरपालिका वडा नम्बर १, २ र ४ का बासिन्दाका लागि १८ लाख ५२ हजार ५०० कित्ता छुट्याइएको छ। बाँकी ९ लाख ९७ हजार ५०० कित्ता भने सोही नगरपालिकाका वडा नम्बर ३, ५, ६, ७, ९, १० र ११ का बासिन्दामा वितरण गरिनेछ।

यसैगरी सर्वसाधारणका लागि छुट्याइएको कुल सेयरमध्ये १० प्रतिशतले हुन आउने ५ लाख ७० हजार कित्ता सेयर वैदेशिक रोजगारीमा रहेका नेपालीहरूका लागि सुरक्षित गरिएको छ। जसमा सम्बन्धित निकायबाट श्रम स्वीकृति लिएका नेपालीहरूले मात्र यसमा आवेदन दिन सक्नेछन्।

यस आईपीओमा न्यूनतम १० कित्ता र अधिकतम २० हजार कित्तासम्म आवेदन दिन सकिनेछ। त्यसैगरि आयोजना प्रभावित क्षेत्रका लागि निष्काशन बन्द छिटोमा चैत २२ गते  हुने छ भने मागअनुसार आवेदन नपरेमा वैशाख ७ गतेसम्म खुला रहनेछ। त्यस्तै, वैदेशिक रोजगारीमा रहेका नेपालीका लागि निष्काशन बन्द छिटोमा चैत ११ गते र ढिलोमा चैत २२ गतेसम्म रहनेछ।

आईपीओको निष्काशन तथा बिक्री प्रबन्धकको रूपमा लक्ष्मी सनराइज क्यापिटल लिमिटेड नियुक्त भएको छ।