काठमाडौं - माजिद अन्सारी गत वर्ष भएको जेनजि आन्दोलनका एक अगुवा हुन । उनी जस्तै थुप्रै  योद्धाहरु आन्दोलनले अपेक्षा गरेको परिणाम नआएकोमा निराश र आक्रोशित देखिन्छन् । अन्सारीका प्रश्नहरुले नेपाल सरकार र राजनीतिक दलहरुलाई इतिहासको कठघरामा उभ्याइदिएका छन् । 

१. फूलको थुँगा समेत नचुड्ने प्रतिबद्धताका साथ सुरु भएको आन्दोलन एकाएक कसरी उग्र बन्यो? कसले? कसरी? र के नियतले? आन्दोलनलाई उग्र बनाउने काम गर्यो?

२. जेन-जी आन्दोलन अघि नै ईपीएस कोरिया आवेदन सम्बन्धी आन्दोलन र दुर्गा प्रसाईं नेतृत्वको २०८१ चैत्र १५ गतेको राजावादी आन्दोलनमा दलका कार्यालयहरू, मिडिया हाउसहरु तथा संसद केन्द्रित आगजनीको प्रयासहरू भएको उदाहरण हुँदा हुँदै र जेन-जी एउटा पुस्ता भएकोले जस्तो सुकै व्यक्ति आन्दोलनमा आउन सक्ने सम्भावना देख्दा देख्दै हजारौं आन्दोलनकारी माइतीघरबाट एभरेष्ट होटल तिर जाँदै गर्दा पनि एभरेष्ट होटल अगाडि पर्याप्त व्यारिगेट सहितको प्रहरीकोे व्यवस्था किन गरिएन?

३. जेन-जी पुस्तामा तत्कालीन समयमा १४ वर्षको नाबालक समेत रहेको थाहा हुँदा हुँदै टिकटक मार्फत प्रहरीको पोशाक लगाएको (सम्भवतः ए आई जेनेरेटेड) व्यक्तिले स्कुलको ड्रेसमा आए प्रहरीले गोली चलाउन पाउँदैन, यो इन्टरनेशन कानूनमा छ भन्ने कुराको भ्रम फैलाएर नाबालक विद्यार्थीहरूलाई बन्दुक अगाडि उभिन कसले भूमिका खोल्यो? त्यो भ्रामक र उत्तेजक भिडियोको प्रतिवाद तत्कालीन प्रहरी प्रमुख, तत्कालीन महान्यायाधिवक्ता, तत्कालीन गृह सचिव, तत्कालीन सिडियो, तत्कालीन गृहमन्त्री र कानून मन्त्री लगायतबाट किन भएन? आन्दोलनमा नाबालकहरु आउने सम्भावना देख्दा देख्दै नाबालकहरुकोे बीचमा फैलाइएको भ्रममा राज्यका निकाय तथा जिम्मेवार व्यक्तिहरूद्वारा मौन किन बसियो?  

४. आन्दोलन हुनु भन्दा केही दिन अघि देखि नै टिकटकमा लगभग सबै पोस्टको कमेन्टमा मोलोटभ (पेट्रोल बम) बनाउने तरिकाको फोटो र संसद भवन सहित सिंहदरबार जलिरहेको AI GENERATED तस्बिर र भिडियोहरु कसले फैलाइरहेको थियो? राज्यको सुरक्षा निकायहरूले मोलोटभ र संसद भवन सहित सिंहदरबार जलिरहेको फोटो भिडियो देख्दा देख्दै त्यसलाई रोक्न तयारी किन गरेन?

५. सिंहदरबार परिसर भित्रै सेनाको गण हुँदा हुँदै सिंहदरबारबाट नजिकै जङ्गी अड्डा हुँदा हुँदै पनि सिंहदरबार कसरी जल्यो?

६. कर्फ्यु आदेश जारी भइसकेको सूचना बिजुलीबजार पुल सम्मै रहेको भीडलाई समयमै र पर्याप्त माइकिङ सहित जनाकारी किन दिइएन?  

७. करिब ११ बजे पछि आन्दोलनको अवस्था एकदमै बिग्रिँदै गएको कुरा प्रत्यक्ष रूपमा देखिँदा देखिँदै अग्रपङ्क्तिमा सेतो मिनी ट्रकमा सवार रहेका र माइकको पहुँचमा रहेका नेतृत्वकर्ताहरूले त्यसलाई तत्काल किन सम्बोधन गरेनन्? जोखिम स्पष्ट देखिसके पछि पनि अग्रपङ्क्तिमा सेतो मिनी ट्रकमा सवार जिम्मेवारीहरुले आन्दोलन अघि बढाइरहने कुराको निर्णय कसको थियो?

८. एभरेष्ट होटल अगाडि पुग्दा सम्म कालो रंगको फौजी जस्तो ड्रेस लगाएका व्यक्तिहरू कोे कोे थिए? फौजी जस्तो ड्रेस लगाउनुको उद्देश्य के थियो?

९. ब्यारिकेड तोड्न कसले उक्सायो? यदि उद्देश्य शान्तिपूर्ण प्रदर्शन थियो भने ब्यारिकेड तोड्ने अवस्था कसरी आयो?

१०. स्कुलको पोशाकमै रहेका नाबालक विद्यार्थी माथी गोली चलाउने आदेश कसले दियो?

११. रास्वपा र काठमाडौं नगर प्रमुखको टोली बाहेक काठमाडौंमा रहेको लगभग सबै नेताहरु घर खोजी खोजी छानीछानी कसले र कसरी जलायो? केही वरिष्ठ अधिवक्ताहरूकोे अफिस र घर खोजी खोजी छानी छानी किन, कसले र कसरी जलायो? देशभर एउटै तरिकाले, एउटै समयमा, संगठित रूपमै आगजनी कसरी भयो? एउटै साधन प्रयोग गरेर यो विनाश कसरी सम्भव भयो?

१२. केपी ओली र रमेश लेखक खोज्न हिँडेको भीडलाई सिंहदरबार तर्फ कसले मोड्यो? राज्यप्रति आक्रोशित मानिसहरूलाई भाटभटेनी र हिल्टन होटल जलाउने दिशामा कसले, किन र कसरी मोड्यो?

१३. तत्कालीन थुनुवा रवि लामिछानेलाई थुनामुक्त गर्ने गैरकानूनी किर्ते कागज बनाउनेलाई कारवाही किन भएन?

१४. कार्की आयोगको प्रतिवेदनले २३ गतेको बारेमा सिफारिस गरिरहँदा २४ गतेको बारेमा किन मौन रह्यो?

१५. बालेन्द्र शाह नेतृत्वको जेन-जी शहीद र घाइतेहरुको रगतको नाममा बनेको सरकारले कार्की आयोगकोे प्रतिवेदनले कारवाही सिफारिस गरेको तत्कालीन सशस्त्र प्रहरीकोे AIGP लाई IGP किन बनायो?

१६. कार्की आयोगको प्रतिवेदनले कारवाही सिफारिस गरेका गृह प्रशासन र प्रहरीहरुलाई हाल सम्म कारवाही किन गरिएन?

१७. पूर्व प्रधानन्यायाधीश सुशीला कार्की प्रधानमन्त्री बनाउने निर्णय कसको थियो? शुशिला कार्कीको नाम Discord मा कसरी आयो? Discord जहाँ नेपाली बाहेक अरू देशका नागरिकहरू पनि च्याट बक्समा थिए, त्यस्तो एपमा आएको केही हजार थान भोटिङलाई कसरी ३ करोड सार्वभौम नेपालीको भोट मानेर प्रधानमन्त्री स्वीकार गरियो? डिस्कोर्डबाट प्रधानमन्त्री बनाइयो भन्ने गलत भाष्य नै किन सिर्जना भयो?

१८. कार्की आयोगको प्रतिवेदन चुनाव अघि किन सार्वजनिक गरिएन? निर्वाचनको मत परिणाम सम्म प्रतिवेदन सार्वजनिक नगरी चुनाव सम्म पर्खिनुकोे कारण के थियो? चुनाव पछि अचानक कार्की आयोगको प्रतिवेदन कसरी लिक भयो? कसले लिक गर्यो? राज्यको संवेदनशील दस्तावेजको रुपमा रहेको कार्की आयोगको प्रतिवेदन लिक गर्नेलाई राजद्रोहमा कारवाही किन गरिएन? कार्की आयोगको प्रतिवेदन हाल सम्म पनि औपचारिक रुपमा सार्वजनिक किन गरिएन?

१९. जेन-जी आन्दोलन सम्बन्धी भिडियो रिपोर्ट चुनाव भन्दा ठीक केही दिन मात्रै अगाडि के नियतले बिबिसी नेपाल द्वारा सार्वजनिक गरियो?

२०. राष्ट्रिय मानव अधिकार आयोगको प्रतिवेदनको पूर्णपाठ हाल सम्म किन सार्वजनिक गरिएन?