काठमाडौं- यूनाइटेड अजोड इन्स्योरेन्स लिमिटेडले दैवी प्रकोपबाट प्रभावित नागरिकको राहत तथा पुनर्स्थापनाका लागि प्रधानमन्त्री दैवी प्रकोप उद्धार कोषमा ३१ लाख ७० हजार रुपैयाँ सहयोग गरेको छ।

कम्पनीले संस्थागत सामाजिक उत्तरदायित्वअन्तर्गत कम्पनीको तर्फबाट २५ लाख रुपैयाँ तथा कर्मचारीहरूको तर्फबाट एक दिनको तलब बराबरको ६ लाख ७० हजार रुपैयाँ गरी कुल ३१ लाख ७० हजार रुपैयाँ राहत कोषमा जम्मा गरेको जनाएको छ।

हालैका प्राकृतिक विपद्का कारण देशका विभिन्न क्षेत्रमा जनधनको ठूलो क्षति भएको तथा प्रभावित नागरिकको तत्काल राहत, उद्धार र पुनर्स्थापनाका लागि सहयोग आवश्यक रहेको अवस्थामा कम्पनीले उक्त रकम प्रदान गरेको हो।

कम्पनीका अनुसार विपद्का कारण प्रभावित नागरिक तथा परिवारलाई राहत उपलब्ध गराउने र पुनर्स्थापनाका प्रयासमा सहयोग पुर्‍याउने उद्देश्यले योगदान गरिएको हो। कम्पनी र कर्मचारीहरूको संयुक्त सहभागितामा गरिएको यस सहयोगले विपद्का समयमा निजी क्षेत्रको सामाजिक उत्तरदायित्व र मानवीय सहयोगको भूमिकालाई समेत प्रतिबिम्बित गरेको कम्पनीले जनाएको छ।

यूनाइटेड अजोड इन्स्योरेन्सले सामाजिक उत्तरदायित्वलाई आफ्नो व्यावसायिक गतिविधिको महत्वपूर्ण पक्षका रूपमा अघि बढाउँदै आएको बताएको छ। विपद् तथा संकटका समयमा प्रभावित समुदायलाई सहयोग पुर्‍याउनु संस्थागत दायित्वसँगै मानवीय जिम्मेवारीसमेत भएकाले कम्पनी र कर्मचारीहरू यस अभियानमा सहभागी भएको जनाइएको छ।

कम्पनीको तर्फबाट गरिएको २५ लाख रुपैयाँ र कर्मचारीहरूले आफ्नो एक दिनको पारिश्रमिकबाट उपलब्ध गराएको ६ लाख ७० हजार रुपैयाँले राहत तथा पुनर्स्थापनाका कार्यमा थप सहयोग पुग्ने अपेक्षा गरिएको छ।

विपद्पछि प्रभावित क्षेत्रका नागरिकको आधारभूत आवश्यकता पूरा गर्न, क्षतिग्रस्त संरचनाको पुनर्निर्माण तथा पुनर्स्थापनाका लागि सरकारी कोषमा विभिन्न निजी क्षेत्रका संस्था तथा व्यक्तिहरूले सहयोग गर्दै आएका छन्। यसै क्रममा यूनाइटेड अजोड इन्स्योरेन्सको योगदान पनि विपद् प्रभावित नागरिकको राहतमा केन्द्रित भएको कम्पनीले जनाएको छ।