काठमाडौँ - नेपालले ग्लोबल टुरिजम अवार्ड २०२४ मा ‘बेस्ट ट्राभल फ्रेन्डली गन्तव्य’ को उपाधि प्राप्त गरेको छ । 

विभिन्न देशहरूको नोमिनेसनबाट नेपालले सो उपाधि प्राप्त गरेको हो ।ट्राभल वर्ल्ड अनलाइन (टीडब्लुओ) ले भारतको नयाँ दिल्लीमा साउन १८ गते नयाँ दिल्लीमा आयोजना गरेको कार्यक्रममा नेपाललाई बोर्डलाई ग्लोबल टुरिजम अवार्ड २०२४ मा ‘बेस्ट ट्राभल फ्रेन्डली गन्तव्य’ का रूपमा सम्मान गरिएको हो । 

नेपालका तर्फबाट अवार्ड ग्रहण गर्दै नेपाल पर्यटन बोर्डका निमित्त कार्यकारी प्रमुख हिक्मत सिंह ऐरले यो सम्मानले नेपाल पर्यटकका लागि सुरक्षित र पर्यटकमैत्री गन्तव्य हो भन्ने सन्देश विश्वभर फैलाउन सहयोग पुगेको र यसले नेपालको समग्र पर्यटन प्रवर्द्धनमा सहयोग पुग्ने बताए । साथै उनले नेपालको यो प्रतिष्ठालाई कायम राख्न आफूहरू सधैँ प्रयत्नशील रहने समेत बताए । 

अवार्ड समारोहमा पर्यटन उद्योगमा उत्कृष्टता र नवप्रवर्तनको क्षेत्रमा महत्त्वपूर्ण योगदान पुर्‍याउने व्यक्ति तथा संस्थालाई सम्मान गरिएको थियो । जसअन्तर्गत बेस्ट वेलनेस रिसोट कैराली (आयुर्वेदिक उपचार गाउँ) भारत, उत्कृष्ट इनबाउन्ड अपरेटरमा क्रिएटिभ ट्राभल (भारत) , सर्वश्रेष्ठ अन्तर्राष्ट्रिय पर्यटन बोर्डमा श्रीलङ्का पर्यटन प्रवर्द्धन ब्यूरो, उत्कृष्ट उदीयमान पर्यटन गन्तव्य (अन्तर्राष्ट्रिय)  अजरबैजान पर्यटन, बेस्ट डोमेस्टिक टुर अपरेटरमा सदर्न ट्राभल भारत,उत्कृष्ट दिगो राज्यमा मध्य प्रदेश पर्यटन बोर्डलाई सम्मान गरिएको थियो ।