काठमाडौँ –उपेन्द्र यादवले नेतृत्व गरेको जनता समाजवादी पार्टी (जसपा) नेपालले महाधिवेशन भएको झण्डै अढाई महिनापछि पदाधिकारी चयन गरेको छ । महाधिवेशनबाट अध्यक्ष मात्र छानेको पार्टीले पदाधिकारीसहित कार्यकारिणी समिति, केन्द्रीय समिति तथा केन्द्रीय निकायहरूमा सदस्यहरू चयन गरेको छ ।

सोमबार जारी निर्णय अनुसार सह–अध्यक्षमा रकम चेम्जोङ चयन भएका छन् । त्यस्तै, पाँच जना उपाध्यक्षहरूमा राजकिशोर यादव, मृगेन्द्र कुमार सिंह यादव, गोविन्द चौधरी, शिवलाल थापा मगर, विद्युत् बज्राचार्य रहेका छन् ।

महासचिवमा लालबाबु राउत र रामकुमार शर्मालाई चयन गरिएको छ भने पार्टीले प्रवक्तामा मनिष कुमार सुमनलाई चयन गरेको छ ।