काठमाडौं- युक्रेनकी अर्थमन्त्री तथा अमेरिकासँगको खनिज सम्झौताका मुख्य वार्ताकार युलिया स्विरिडेन्कोलाई बिहीबार नयाँ प्रधानमन्त्री नियुक्त गरिएको छ । उनी सन् २०२२ मा रुसको पूर्ण मापदण्डको आक्रमण सुरु भएपछि देशको पहिलो नयाँ सरकार प्रमुख बनेकी हुन् । 

स्विरिडेन्को युक्रेनको सरकारमा नयाँ भूमिका लिने अधिकारीहरूको समूहमध्ये एक हुन् । राष्ट्रपति भोलोदिमर जेलेन्स्कीले युद्धले थकित राष्ट्रलाई नयाँ ऊर्जा दिन र रुसको निरन्तर आक्रमणको सामना गर्न घरेलु हतियार उत्पादन बढाउने प्रयासमा मन्त्रिपरिषद्को फेरबदल गरेका छन् । 

तर घरेलु स्तरमा मन्त्रिपरिषद्को यो पुनर्गठनलाई कुनै ठूलो परिवर्तनका रूपमा लिइएको छैन किनकि जेलेन्स्की युद्धको अवधिमा अझै पनि आफ्नो प्रभावकारिता र वफादारी प्रमाणित गर्ने अधिकारीहरूमा निर्भर छन् । युद्ध अहिले चौथो वर्षमा छ ।

युक्रेनको इतिहासमा सबैभन्दा लामो समयसम्म सेवा गर्ने सरकार प्रमुख प्रधानमन्त्री डेनिस स्मिहलको प्रतिस्थापनसहित शीर्ष सरकारी पदहरू फेरबदल गर्न जेलेन्स्कीले बिहीबार नामाङ्कन पेश गरे। संसदीय वेबसाइटका अनुसार स्मिहल अब रक्षामन्त्री बन्नेछन्।

मन्त्रिपरिषद्मा अन्य परिवर्तनहरू अपेक्षित छन्, तर प्रधानमन्त्रीका रूपमा स्विरिडेन्कोको नियुक्ति मुख्य चर्चाको विषय बनेको छ ।

उनले अमेरिका–युक्रेन खनिज सम्झौताको वार्तामा मुख्य भूमिका खेलेकी थिईन् । सम्झौताले किएभका लागि सर्तहरू स्वीकार्य छन् भन्ने सुनिश्चित गरेको थियो । स्विरिडेन्कोले प्रायः पश्चिमी साझेदारहरूसँग उच्च–स्तरीय वार्तामा युक्रेनको प्रतिनिधित्व गर्दै आएकी छिन् । यसमा रक्षा सहयोग, आर्थिक पुनरुत्थान र पुनर्निर्माणमा केन्द्रित छ ।

सांसद र सहकर्मी अधिकारीहरूले उनलाई राष्ट्रपति कार्यालयप्रति वफादारीको प्रतिष्ठा भएको एक लगनशील कार्यकारीका रूपमा वर्णन गर्छन् ।

मंगलबार, जेलेन्स्कीले स्विरिडेन्को र डिजिटल रूपान्तरण मन्त्री मिखाइलो फेडोरोभसँग एक तस्बिर पोस्ट गरे, जसमा उनले आगामी छ महिनाका लागि फोकस घरेलु हतियार उत्पादन बढाउने, युक्रेनका रक्षा बलहरूका लागि सबै प्रकारका ड्रोनहरूको पूर्ण ठेक्का, आर्थिक सम्भावनाहरू खुलाउन नियमहरू सहज बनाउने र सामाजिक सहायता कार्यक्रमहरूको डेलिभरी सुनिश्चित गर्ने हुने लेखेका छन्।

स्मिहलले मंगलबार प्रधानमन्त्री पदबाट राजीनामा दिने घोषणा गरेका छन् । सन् २०२० मार्च ४ मा नियुक्त भएपछि उहाँले पाँच वर्षभन्दा बढी समयसम्म यो पद सम्हालेका थिए ।

युक्रेनी विश्लेषकहरू र स्थानीय सञ्चारमाध्यमहरूले स्मिहललाई विरलै एक स्वतन्त्र राजनीतिक व्यक्तित्व वा जेलेन्स्कीको प्रतिकूलका रूपमा चित्रण गरेका छन् । स्विरिडेन्को जस्तै, उनी पनि राष्ट्रपति र उनको टोलीप्रति वफादार मानिन्छन् ।

रक्षामन्त्रीका रूपमा उनको नयाँ पदको अर्थ उनले पूर्ण रूपमा सरकार छाडेका छैनन् बरु शक्तिशाली भूमिकामा मन्त्रिपरिषद्मा बसिरहेका छन्  । रक्षा मन्त्रालयले सबैभन्दा ठूलो बजेट सञ्चालन गर्छ र युद्धका कारण उल्लेखनीय महत्त्व राख्छ ।

स्मिहलले रुस्टेम उमेरोभलाई प्रतिस्थापन गर्नेछन् । उमेरोभले सुधारलाई अगाडि बढाउन खोजेको भए पनि आफ्नो कार्यकालमा युक्रेनको रक्षा खरिद प्रणालीमा आन्तरिक उथलपुथल र निरन्तर निष्क्रियता देखेका थिए।  अन्तर्राष्ट्रिय मञ्चमा उनको सक्रिय भूमिकाका बावजुद, आलोचकहरूले मन्त्रालय खराब व्यवस्थापनबाट ग्रस्त रहेको बताएका छन् । एपी