काठमाडौं- चिनियाँ बस निर्माता कम्पनी हेनान शाओलिनका दुई मोडलका विद्युतीय बस नेपाली बजारमा भित्रिने भएका छन्। सिनर्जी मोटर्स प्रालिले शाओलिन ब्रान्डका ७.२ मिटर लामो इलेक्ट्रिक बस र ५.४ मिटर लामो इलेक्ट्रिक मिनिबसको मूल्य सार्वजनिक गरेको छ।

कम्पनीले सार्वजनिक गरेको मूल्यसूचीअनुसार ७.२ मिटर लामो इलेक्ट्रिक बसको अधिकतम खुद्रा बिक्री मूल्य (एमआरपी) १ करोड २९ लाख ९९ हजार रुपैयाँ तोकिएको छ। त्यस्तै, ५.४ मिटर लामो इलेक्ट्रिक मिनिबसको मूल्य ५९ लाख ५० हजार रुपैयाँ निर्धारण गरिएको छ।

७.२ मिटर लामो शाओलिन बसमा १२५.७ किलोवाट आवर क्षमताको ब्याट्री प्याक जडान गरिएको छ। यसमा १०० किलोवाट रेटेड र २०० किलोवाट पिक पावर क्षमताको मोटर रहेको छ। यसको मोडल नम्बर एसएलजी६७२०ईभीजी१आर रहेको छ।

त्यस्तै, ५.४ मिटर लामो मिनिबसमा ५१.४५ किलोवाट आवर क्षमताको ब्याट्री उपलब्ध छ। यसमा ४० किलोवाट रेटेड र ८० किलोवाट पिक पावर क्षमताको मोटर जडान गरिएको छ। यसको मोडल नम्बर एसएलजी६५४०ईभी१आर हो।

दुवै विद्युतीय बस चीनमा उत्पादन भएका हुन्। नेपालमा यी सवारीसाधनको बिक्री तथा वितरण सिनर्जी मोटर्सले गर्नेछ। कम्पनीले सार्वजनिक गरेको मूल्यसूचीमा दुवै मोडलको मूल्य प्रतिइकाइ उल्लेख गरिएको छ।

नेपालमा सार्वजनिक यातायातमा विद्युतीय सवारीसाधनको प्रयोग बढ्दै गएको अवस्थामा फरक आकार र ब्याट्री क्षमताका यी दुई मोडलले बजारमा थप विकल्प उपलब्ध गराउने अपेक्षा गरिएको छ।

यद्यपि, कम्पनीले यी बसको बिक्री सुरु हुने मिति, ब्याट्री चार्ज हुन लाग्ने समय, एकपटक पूर्ण चार्ज गर्दा गुड्न सक्ने दूरी (रेन्ज) तथा अन्य सुविधाबारे विस्तृत विवरण सार्वजनिक गरेको छैन।

हाल सार्वजनिक गरिएको मूल्य भन्सार प्रयोजनका लागि निर्धारण गरिएको मूल्यसूचीमा आधारित रहेकाले बिक्री मूल्य, उपलब्ध सुविधा र प्राविधिक विवरणबारे थप जानकारीपछि सार्वजनिक हुन सक्नेछ।