काठमाडौँ । भारतका प्रधानमन्त्री नरेन्द्र मोदीले आफ्नो मित्र राष्ट्रलाई गाई उपहार दिएर “गाई कूटनीति”को अभ्यास थालेका छन् । 

    एउटा भ्रमणका क्रममा प्रधानमन्त्री मोदीले रुवाण्डालाई २०० वटा गाई हस्तान्तरण गरेर यस्तो अभ्यास गर्नुभएको एएफपीले जनाएको छ ।

    राजधानी किगालीबाट दक्षिणतर्फ रहेको रबेरु गाँउका गरीब बासिन्दालाई मोदीले गाई हस्तान्तरण गर्नुभएको अधिकारीहरूले बताएका छन् । 

    हस्तान्तरण गरिएका गाईबाट त्यहाँका बालबालिकाले दूध उपभोग गर्न पाउने अपेक्षा गरिएको समाचारमा जनाइएको छ ।  

    रुवाण्डासँगै मोदीले युगाण्डाको पनि भ्रमण गर्नुभएको छ । ब्रिक्स शिखर सम्मेलनमा सहभागी हुन उहाँ त्यसतर्फ जानुभएको अधिकारीहरूले बताएका छन् । 

    शिखर सम्मेलनका क्रममा प्रधानमन्त्री मोदीले चीन, रुस, ब्राजिल र दक्षिण अफ्रिकाका नेताहरूसँग जोहानेसबर्गमा भेटवार्ता गर्ने कार्यक्रम रहेको छ । 

    “रुवाण्डाको ग्रामीण क्षेत्रको अवस्थाले मलाई प्रभावित बनायो, एउटा नमूना गाँउका बासिन्दालाई गाई उपहार दिन पाएकाले मलाई यो भ्रमण स्मरणीय भएको छ,” प्रधानमन्त्री मोदीले भने । 

    उनले आफूलाई अमूल्य अवसर दिएको भन्दै रुवाण्डाका राष्ट्रपति पाउल कागामेलाई धन्यवाद पनि दिएका थिए । मोदी र कागामेले विभिन्न सहयोग आदानप्रदान सम्झौतासमेत गरेका छन् ।