काठमाडौँ – लागु औषध कोकिन तस्करीमा संलग्न गिरोहको तस्करी गर्ने तरिका देखेर प्रहरी नै आश्चर्यचकित भएको छ । पक्राउ परेका ब्राजिलियन नागरिकहरूले कोकिन राखिएको क्याप्सुल निल्ने र पेटमा राखेर नेपालसम्म तस्करी गर्ने गरेको खुलेको छ ।
लागु औषध नियन्त्रण ब्युरोका प्रवक्ता रामेश्वर कार्कीले ब्राजिलियन नागरिकहरू लारिसन ब्रिटो दोस सान्तोस र फर्नान्डा भाल दोस सान्तोसले यसरी कुल १ केजी ४५५ ग्राम कोकिन तस्करी गरेको पाइएको लागु जानकारी दिए ।
‘अनुसन्धानको क्रममा निजहरू दुवै जनाले ब्राजिलको सापाउलोबाट कोकिनको क्याप्सुलहरू निलेर पेटमा लुकाइ छिपाइ गरी नेपाल ल्याएको खुल्न आएको छ’, उनले भने ।
उनीहरुले चैत १३ गते काठमाडौँको ठमेलको एक होटेलमा सुटकेस भित्र लुकाएर राखेको ८४० ग्राम कोकिन तथा थप ५५० ग्राम गरी जम्मा १३९ क्याप्सुलबाट कोकिन १ किलो ३९० ग्राम बरामद भएको थियो । यस्तै नेपाल प्रहरी अस्पतालमा परीक्षण गराउँदा लारिसनको पेटबाट अरु ६५ ग्राम कोकिन बरामद गरिएको प्रहरीले जनाएको छ । यसरी बरामद भएको कोकिनको अवैध बजार मूल्य ४ करोड ३६ लाख ५० हजार बराबर भएको बताइएको छ
दुबै जनालाई जिल्ला अदालत काठमाडौँबाट अनुमति लिई थप अनुसन्धान भइरहेको प्रहरीले जनाएको छ। उनीहरू अन्तर्राष्ट्रिय लागूऔषध तस्करीमा आबद्ध गिरोहका सदस्यहरू भएको प्रहरीको दाबी छ ।
प्रतिक्रिया