काठमाडौं- जिल्ला अदालत काठमाडौंले नेपाल धितोपत्र बोर्ड (सेबोन) का अध्यक्ष सन्तोषनारायण श्रेष्ठविरुद्ध प्रकाशित गरिएका सामग्री हटाउन दुई सञ्चारमाध्यमलाई अल्पकालीन आदेश दिएको छ । 

जिल्ला अदालतका न्यायाधीश पीताम्बर शर्माको एकल इजलासले बिजमान्डु प्रालि र नेपाल खबर प्रालिलाई सो आदेश गरेको हो ।

ती समाचार पोर्टलमा प्रकाशित सामग्रीले आफ्नो प्रतिष्ठामा आँच पुर्याएको भन्दै श्रेष्ठले अदालत गुहारेका थिए । उनले समाचार हटाउन अन्तरिम आदेश माग गरेकोमा अदालतले अल्पकालीन आदेश गरेको छ ।

निवेदकको माग बमोजिम अन्तरिम आदेश किन जारी हुनु नपर्ने हो भन्ने आधार र कारण समेत राखी १५ दिन भित्र लिखित जवाफ पेश गर्न पनि भनिएको छ ।

सो अल्पकालीन आदेशको निरन्तरता सम्बन्धी छलफलका लागि असार ४ गते छलफलको पेसी तोकिएको छ ।