काठमाडौं–आगामी दशैँलाई लक्षित गरी काठमाडौं उपत्यकाको लागि खसी, बोका र च्याङ्ग्रा ल्याउने क्रम सुरु भएको छ । काठमाडौं उपत्यकालाई लक्षित गरि नेपाल चौपाया बजार तथा बधशाला व्यवस्थापन प्रा.लि. अर्थात (कंलकी खसीबजार) मा नेपालका विभिन्न जिल्ला लगायत भारतबाट खसी, बोका र च्याङ्ग्रा भित्रिन थालेको हो । 

खाद्य व्यवस्था तथा व्यापार कम्पनी लिमिटेडले पनि यस वर्षका लागि खसी र च्याङ्गाको अनलाइनबाट प्रि–बुकिङ सुरु गरेको छ । दशैंलाई लक्षित गरि उपभोक्ताका लाीग खाद्य व्यवस्था तथा व्यापार कम्पनी लिमिटेडले मंगलबार (२०८२ साल भदौ १७ गते) देखि अनलाइन प्रि–बुकिङ सुरु गरिसकेको छ । कम्पनीले यो वर्ष २ हजार खसी, बोका र च्याङ्ग्रा ल्याउने तयारी गरिरहेको छ । कम्पनीले सञ्चालन गर्ने सुपथ मूल्य पसलबाट खसी, बोका र च्याङ्ग्रा खरिद गर्दा उपभोक्ताले प्रतिकिलो १० रुपैयाँसम्म छुट पाउने भएका हुन् । 

त्यसैगरी नीजि क्षेत्रबाट सञ्चालित कंलकी खसीबजार (नेपाल चौपाया बजार तथा बधशाला व्यवस्थापन प्रा.लि.) ले पनि दशैंका लागि आफ्नै व्यवस्थापनमा खसी, बोका र च्याङ्गा ल्याउन थालेको छ । दशैं लक्षित ल्याइएका खसी, बोका र च्याङ्ग्राको खरिद–विक्री घटस्थापनादेखि सुरु भई सप्तमीसम्म हुने नेपाल चौपाया बजार तथा बधशाला व्यवस्थापन प्रा.लि.ले जनाएको छ । 

निजी क्षेत्रबाट सञ्चालित कंलकीको खसीबजार (नेपाल चौपाया बजार तथा बधशाला व्यवस्थापन प्रा.लि.) ले दशैंका लागि भनेर खसी, बोका र च्याङ्ग्राको बास्तविक मूल्य निर्धारण नगरिसकेको भएपनि अघिल्लो वर्षको तुलानामा यो वर्ष बढ्न सक्ने व्यवसायीको अनुमान छ । ल्याइसकेको खसी, बोका र च्याङ्ग्रालाई उचित स्थान (उनीहरु बस्ने खोर) मा व्यवस्थीत तरिकाले राखिँदै छन् ।