काठमाडौँ - नेपालगन्जको सामुदायिक विद्यालयमा अध्ययनरत बालबालिकाको निःशुल्क दाँत परीक्षण गरी मञ्जन र ब्रस वितरण गरिएको छ । लायन्स क्लब अफ नेपालगन्ज जीवन र बाँके डेन्टल क्लिनिकको सहकार्यमा नेपालगन्ज –१० चारबाहिनी रोडमा रहेको युद्ध संस्कृत माबिमा निःशुल्क दाँत परीक्षण कार्यक्रम आयोजना गरी बालबालिकाको दाँत परीक्षण गर्नुका साथै मन्जन र ब्रस वितरण गरिएको क्लवका अध्यक्ष जीवन शर्माले बताए ।

सो विद्यालयमा अध्ययनरत १५० भन्दा बढी विद्यार्थीलगायत शिक्षक शिक्षिकाको निःशुल्क दाँत परीक्षण गरिएको बताए । सो शिविरमा सहभागी बालबालिका र शिक्षक–शिक्षिका सबैलाई दाँतको सुरक्षा गर्ने तरिका, दाँत कमजोर किन र कसरी हुन्छन् भन्ने बारेमा तालिम दिइएको पनि अध्यक्ष शर्माले बताए । सो अवसरमा विद्यार्थी र शिक्षक–शिक्षिका समेतले दाँत बारेमा विभिन्न प्रकारका जिज्ञासा राखेका थिए । निःशुल्क दाँत शिविरमा दाँत परीक्षण गराएका सबै १५० बालबालिकालाई जनही एक दन्त मन्जन र एक ब्रस पनि वितरण गरिएको लायन्स क्लब अफ नेपालगन्ज जीवनले जनाएको छ ।