काठमाडौं- उत्तर, पश्चिमी र मध्य भारतका कुल २७ विमानस्थलहरु शनिबार बिहानसम्मका लागि बन्द भएका छन् । शनिबार स्थानीय समय ५ः२९ बजेसम्मका लागि यी विमानस्थलहरु व्यावसायिक सञ्चालनका लागि बन्द गरिएको टाइम्स अफ इन्डियाको रिपोर्टलाई उद्धृत गर्दै इकोनोमिक टाइम्सले लेखेको छ ।

विमानस्थल बन्द हुँदा हवाई यातायातमा ठूलो अवरोध आएको छ । भारतीय विमान कम्पनीहरुले बिहीबार ४३० उडानहरु रद्द गरेका छन् । जुन देशको कुल निर्धारित उडानहरुको लगभग ३ प्रतिशत हो । पाकिस्तानका विमान कम्पनीहरुले १४७ भन्दा बढी उडानहरु रद्द गरेका छन् । जुन उनीहरुको दैनिक तालिकाको १७ प्रतिशत हो ।

विश्वव्यापी उडान ट्र्याकिङ प्लेटफर्म, फ्लाइटराडार२४ ले बिहीबार पाकिस्तान र भारतको पश्चिमी करिडोर ९कश्मीरदेखि गुजरातसम्म० माथिको हवाई क्षेत्र धेरै हदसम्म सर्वसाधारण बोक्ने विमानहरुबिहिन रहेको देखाएको छ । प्रभावित भारतीय एयरपोर्टहरुमा श्रीनगर, जम्मू, लेह, चंडीगढ, अमृतसर, लुधियाना, पटियाला, भटिन्डा, हलवारा, पठानकोट र भुन्तर रहेका छन् । 

यसका साथै, सिमला, गग्गल, धर्मशाला, किशनगढ, जैसलमेर, जोधपुर, बिकानेर, मुन्द्रा, जामनगर, राजकोट, पोरबन्दर, कान्डला, केन्डल, केशुद, भुज, ग्वालियर र हिन्डन एयरपोर्ट पनि प्रभावित भएका छन् । सैन्य चार्टरका लागि मुख्यरुपमा प्रयोग हुने एयरपोर्टहरु पनि बन्द गरिएको छ । संवेदनशील क्षेत्रबाट बच्न विभिन्न एयरलाइन्सहरुले उडानहरु परिवर्तन वा रद्द गरिरहेका छन् । 

बुधबार, लगभग २५० उडानहरु पहिले नै रद्द भइसकेका थिए । एयर इन्डियाले अमृतसरका लागि उडान गरिएका २ अन्तर्राष्ट्रिय उडानहरुलाई दिल्ली डाइभर्ट गर्नुपरेको बताएको छ । अमेरिकन एयरलाइन्सले पनि दिल्ली न्यूयोर्क उडान रद्द गरेको छ । धेरैजसो विदेशी विमान कम्पनीहरुले पाकिस्तानी हवाई क्षेत्र प्रयोग गर्न बन्द गरेका छन् । यसको सट्टा मुम्बई र अहमदाबादमाथि सुरक्षित मार्गहरु प्रयोग गरेर आफ्ना सेवाहरु परिवर्तन गर्न थालेका छन् ।

भारतीय सेनाले अपरेसन सिन्दूर अन्तर्गत पाकिस्तानमा आतंकवादी केन्द्रहरुमा मिसाइल आक्रमण गरेपछि बुधबार पनि ३०० भन्दा बढी उडानहरु रद्द गरिएको थियो । उत्तरी र पश्चिमी भारतका २१ विमानस्थलहरुको सञ्चालन पनि बन्द गरिएको थियो । श्रीनगर, लेह, जम्मू, अमृतसर, चण्डीगढ र जोधपुर लगायत प्रमुख उत्तरी र पश्चिमी शहरहरुमा विमानस्थलहरू बन्द गरिएका छन् । दिल्लीलगायत अन्य शहरहरूमा आंशिक अवरोध देखिएको छ भने यसका १४० भन्दा बढी उडानहरु रद्द गरिएका छन् । -एजेन्सी