काठमाडौं- सांसद जनार्दन शर्माले आर्थिक क्षेत्रको पुनर्संरचना गरेर मात्रै आगामी आर्थिक वर्षको बजेट ल्याउनुपर्ने बताएका छन् । बुधवार प्रतिनिधिसभामा प्रि बजेटमाथिको  छलफलमा बोल्दै उनले यस्तो बताएका हुन् । 

साथै आगामी बजेट आम्दानी र खर्चको फाँट मात्र नभएर देशको समृद्धिको  असमानताको खाडलबाट उक्सिन नसकेका जनतालाई माथि ल्याउने उद्देश्यमूलक दस्ताबेजको रुपमा प्रस्तुत हुने अपेक्षा रहेको बताए । कुल बजेटको ६५ प्रतिशत चालु खर्च हुने गरेकोमा आगामी बजेट ६५ प्रतिशत पुँजीगत खर्च हुने गरी ल्याउन अर्थमन्त्रीको ध्यानाकर्षण गराए । 

‘जनताका अपेक्षा पुरा गराउन हामीसँग स्रोत छैन । त्यो स्रोत कहाँबाट ल्याउने ? आज बजेटको ६५ प्रतिशत चालु खर्चमा जाने गरेको छ,’ उनले भने, ‘३५ प्रतिशत पुँजी गत खर्च हो त्यो पनि खर्च हुँदैन । त्यसकारण ६५ प्रतिशतलाई ३५ मा झार्ने गरी ल्याउनुस् । हाम्रो समर्थन हुनेछ । त्यसको लागि संरचनागत पुनर्संरचना होस् चाहे राजनीति र प्रशासन क्षेत्रको आजको खर्च घटाउनुपर्छ । त्यसबाट मात्रै बजेट बनाउन सक्नुहोला अन्यथा १० खर्ब वरिपरिको बजेट आउँदैछ । राजस्व अरू तानतुन गरेर दुई चार खर्ब थप्नुहोला अरू बन्छ कसरी ? आज देशलाई चाहिएको आर्थिक पुनर्संरचना हो ।’

साथै आर्थिक पुनर्संरचना यस क्षेत्रमा आवश्यक रहेको बताए । ‘अर्थमन्त्रीको ध्यानाकर्षण गर्न चाहन्छु । बजेटको आर्थिक संरचना सुधार गर्नका लागि नभए नै हामी निरन्तर समस्या छौँ,’ उनले भने,‘यसमा कडाभन्दा कडा रूपमा प्रस्तुत हुनुस् दुई तिहाइको सरकार छ त्यसमा हाम्रो पनि समर्थन छ ।’