काठमाडौं- कोसी प्रदेश समग्र पर्यटकीय क्षेत्रका रुपमा अन्य प्रदेश भन्दा सम्पन्न रहेको सांसद योगेश भट्टराईले बताएका छन् ।
प्राकृतिक, सांस्कृतिक, धार्मिक, भौगोलिक, ऐतिहासिक तथा साहसिक पर्यटनमा कोसी प्रदेश अन्य प्रदेशहरु भन्दा सम्पन्न रहेको बताउँदै अन्य प्रदेशहरु यत्तिको सम्पन्न नभएको जिकीर गरे । 

काठमाडौंमा शुक्रबार सुरु भएको कोसी प्रोजेक्ट शो केसको फाइनल चरणको उद्घाटन गर्दै पूर्वसंस्कृति, पर्यटन तथा नागरिक मन्त्री समेत रहेका सांसद भट्टराईले कोसी प्रदेशको विकास, विस्तार र संभावनाहरु पहिल्याउँदै पर्यटनबाटै आर्थिक संमृद्धि खोज्न सकिने बताए।

‘कुनै प्रदेश प्राकृतिक सुन्दरता होला, सांस्कृतिक छैन, कुनै प्रदेश धार्मिक पर्यटनमा सम्पन्न होला प्राकृतिकमा छैन तर, कोसी प्रदेशमा यी सबै कुरा छ ।’ पूर्वमन्त्री भट्टराई भने । 

नेपालको सबैभन्दा होचो ठाउँ केचनाकवल देखि संसारकै सबैभन्दा अग्लो शगरमाथासम्मलाई पर्यटनको गन्तव्य बनाउन सकिने, तीन सय किलोमिटरको दुरीमा भारतको विहारदेखि चीनको तिव्वतसम्म जोड्न सकिने उनको दावी छ । 

आन्तरिक र बाह्य पर्यटकीय हिसाबले कोसी प्रदेशलाई अगाडी बढाउन सकिने, साहसिक पर्यटनमा ताप्लेजुङ देखि दार्चुलासम्मलाई जोड्न सकिने, प्याराग्लाइडिङ, र्याफ्टिङ, मेडिटेसन हरेक हिसाबले विकास गर्न सकिने भन्दै उहाँले छिमेकी मुलुक भारतको बिहारलाई मात्र केन्द्रविन्दु बनाएर पर्यटन प्रवद्र्धन गरे कोसी प्रदेशको समृद्धिमा योगदान पुग्ने चर्चा गरे । साथै, उनले कोसी प्रदेशमा सरकारले अरुण र तमोर नदीमा दुई ठूला जलविद्युत आयोजना निर्माण गइरहेको बताउँदै त्यसले पर्यटन क्षेत्रको विकासमा पनि टेवा पुग्ने बताए । 

कार्यक्रममा बोल्दै अल्पाइन माउन्टेन फेडरेशनका अध्यक्ष गोविन्द भट्टराईले कोसी प्रदेश प्रर्यटकीय क्षेत्रका हिसाबले अत्यन्त धनी रहेको बताउँदै पर्यटनलाई व्यवसायीकरण गर्नुपर्ने बताए । प्राकृतिक, सांस्कृतिक, धार्मिक, साहसिक पर्यटनको प्रवद्र्धनमा सरकार र निजी क्षेत्र सहकार्य गरेर जानुपर्नेमा भट्टराईको जोड छ । 

कोशी प्रोजेक्ट शो केसले कोशी प्रदेशको पर्यटन क्षेत्रमा नयाँ संभावनाहरुको खोजी गरेको आयोजक एलिसन हस्पिटालिटीकी अध्यक्ष एलिना मगरले बताए । कोसी प्रदेशको पर्यटनको विकास गर्न र पर्यटकीय क्षेत्रका नयाँ स्थानहरुको खोजी गर्न सिभिल इन्जिनियरिङ र आर्किटेक्चरका विद्यार्थीहरुको फ्युजन गरेर कोसी प्रोजेक्ट शो केस आयोजना गरिएको बताउँदै अध्यक्ष मगरले पर्यटन भनेको एक दिनको मात्र नभएकोेले भविष्यको लागि आफुहरुले योजना बनाएको जिकीर गरे । साथै, पछिल्लो समय युवाहरु विदेसिइरहेको परिप्रेक्ष्यमा नेपालमै पर्यटन क्षेत्रमा केही गर्न सकिन्छ कि भन्ने हेतूले कार्यक्रम तयार पारिएको जनाए । 

कोसी प्रोजेक्ट शो केसको फाइनल चरणमा पुगेका १० वटा टिमले कोसी प्रदेशका विभिन्न क्षेत्रहरुको स्थलगत अध्ययन अवलोकन गरी बनाएको प्रोजेक्टहरुलाई लगानीकर्ता, स्थानीय तहलाई समेत हस्तान्तरण गरी लगानी गर्ने वातावरण समेत मिलाइएको अध्यक्ष मगरले बताए । 

प्रतियोगिताको उत्कृष्ट १० मा एक्मी कोस्टर टिम एक्मी इन्जिनियरिङ कलेज, एग्रो भिलेज टिम नेपाल इन्जिनियरिङ कलेज, बियोण्ड द ब्रिज टिम ख्वप इन्जिनियरिङ कलेज, कोशी एक्स्प्लोरर टिम पुल्चोक क्याम्पस, पाथ फाइण्डर टिम पुल्चोक क्याम्पस, केटुपिए टिम पुल्चोक क्याम्पस, विनर टिम पुल्चोक क्याम्पस, स्केच स्क्वायर्ड पुल्चोक क्याम्पस, रुलर रिड्ज विल्डर्स टिम नेपाल इन्जिनियरिङ कलेज, पुल्चोक इयर फाइभ पुल्चोक क्याम्पस परेका थिए । 

छनौट भएका १० टिमले कन्सेप्ट पेपरमा तोकिएको स्थल डाँडा बजार, राजारानी, रौता पोखरी, सोलु, सङ्खुवासभा, पानी टार इलाम, सूर्योदय अन्तु इलाम, माई पोखरी, ओखलढुङ्गा लिखु, मुन्धुम सर्किटलगायत क्षेत्रको परियोजनाहरू तयार पारेका छन् ।

कोसी प्रदेश सरकार, नेपाल पर्यटन बोर्ड, नेपाल टेलिकम लगायतले कोसी प्रोजेक्ट सो केशमा सहयोग गरेका छन् । जेठ ११ गतेसम्म चल्ने प्रोजेक्ट सो केशमा प्रथम हुने टीमलाई नगद एक लाख रुपैंया, दोश्रो हुने टीमलाई नगद ५० हजार तथा तेश्रो हुने टीमलाई नगद २५ हजार, प्रमाणपत्र र ट्रफी प्रदान गरिने छ । प्रतियोगिताको समापन आइतबार हुनेछ ।