नेपाल आयल निगमले समयमै भण्डारण ट्यांकी नबनाएपछि पाइपलाइनबाट आएको डिजेल भण्डारणमा समस्या भएको छ ।
भारतीय आयल कर्पोरेसन (आईओसी) र नेपाल आयल निगमबीच भएको सम्झौता अनुसार निगमले बनाउनुपर्ने ८२ लाख लिटर क्षमताका ट्यांकी नबनाउँदा भण्डारणमा समस्या भएको हो ।
आईओसी र निगमको सम्झौताअनुसार ३ अर्ब २४ करोड भारतीय रुपैयाँ लगानीमा निर्माण भएको पाइपलाइन अन्तर्गत निगमले करिब ७५ करोड भारतीय रुपैयाँ लगानी गर्ने प्रतिबद्धता जनाएको थियो ।
जस अनुसार निगमले ४१ लाख लिटर क्षमता (४१ सय केएल) दुई ट्यांकी निर्माण गर्नुपर्ने थियो ।
भारतको मोतीहारीदेखि नेपालको अमलेखगञ्जसम्म निर्माण भएको पेट्रोलियम पाइपलाइन भदौ २४ मा उद्घाटन भएको थियो ।
पाइपलाइनमा तेल आउन थालेदेखि अहिलेसम्म चार करोड ६० लाख लिटरभन्दा बढी डिजेट आइसके पनि नेपालले ट्यांकी निर्माण गरेको छैन ।
अहिले अमलेखगन्जमा २ करोड ४० हजार लिटर डिजेल भण्डारण गर्ने ट्यांकी छन् । जसमध्ये एउटा मटितेलका ट्यांकीलाई स्तरोन्नति गरिएको हो ।
अमलेखगञ्जमा पेट्रोल १९ लाख ३० हजार र मटितेल १५ लाख लिटरको क्षमता छ ।
निगमका कार्यकारी निर्देशक सुरेन्द्र पौडेलले अमलेखगन्जमा रहेको १० बिघा जग्गामा करिब ८ हजार किलोलिटर भण्डारण छिट्टै बनाउने बताए । ‘एक महिनामा काम सुरु हुन्छ ’, उनले भने ।
यसका लागि आईओसीसँग छलफल भइसकेको उनको भनाइ छ ।
प्रतिक्रिया