काठमाडौँ । इन्टरनेट संसार हो । इन्टरनेटकै माध्यमबाट विश्वभरीका दृश्य, घटना, समाचार तथा जानकारी पाउन सकिन्छ । सदुपयोग गरे इन्टरनेटले ज्ञान दिन्छ तर दुरुपयोग भए अपराध पनि निम्त्याउँछ । यसकारण इन्टरनेटको सदुपयोग होस् भन्ने चाहना राख्नु सबैको कामना हुन्छ ।

तर सबैले इन्टरनेटको सही सदुपयोग गर्छन् भन्ने होइन । इन्टरनेटका दुरुपयोगका कारण हुने घटना वा दुर्घटनाले विकासशील राष्ट्रहरूलाई चिन्तित बनाएको छ । 

नेपालको मुलुकी अपराध संहिता ऐन २०७४ को दफा १२१ ले यौनजन्य सामग्रीहरूको आदनप्रदान, प्रकाशन र प्रसारणलाई बन्देज लगाएको छ । यही कानुनलाई टेकेर केही समयअघि मात्रै सरकारले अश्लील दृश्य तथा भिडियो पोस्ट गर्ने ‘पोर्न साइट’ बन्द गर्न नेपाल दूरसञ्चार प्राधिकरणलाई निर्देशन दियो । सरकारको निर्देशन आएलगत्तै नेपाल दूरसञ्चार प्राधिकरणले विभिन्न (इन्टरनेट सर्भिस् प्रोभाइडर) आईएसपी र नेटवर्क सेवा प्रदायक (एनएसपी) हरूलाई पोर्न साइट बन्द गर्न निर्देशन दियो ।
 
प्राधिकरणले असोज ५ गते सबै इन्टरनेट सर्भिस् प्रोभाइडर कम्पनीहरूलाई निर्देशन दिएलगत्तै केही सर्भिस् प्रोभाइडरले बढी चलेका ‘पोर्न साइट’ ब्लक गरिदिए । यद्यपि प्रविधिको अभावका कारण सबै पोर्न साइट बन्द गर्न भने सम्भव भएन । प्राधिकरणले तत्कालका लागि उपलब्ध गराएको ४५ वटा पोर्न साइटहरू ब्लक गरिएको छ ।