काठमाडौं- नेकपा(माओवादी केन्द्र) निकट युवा संगठन वाईसिएलको नवगठित कमिटीप्रति असन्तुष्टि चुलिएको छ  । पार्टीकै नेतादेखि वाईसिएलका नेताहरुसम्म सामाजिक सञ्जालमार्फत असन्तुष्टि प्रकट गरिरहेका छन् ।

वाईसिएलको जेठ (१८–२४) गते काठमाडौंमा सम्पन्न तेस्रो राष्ट्रिय सम्मेलनले ७५ सदस्यीय पदाधिकारी र ३५१ सदस्यीय केन्द्रीय समिति गठन गरेको थियो । 

पार्टीका भातृसंगठनको संयोजक रहेका उपमहासचिव शक्ति बस्नेतकै गृह प्रदेशका वाईसिएलका नेताहरुले समेत विधान विपरीत पदाधिकारी चयन गरेको भन्दै सामूहिक रुपमा असहमति प्रकट गरेका छन् । वाईसिएलको नवगठित पदाधिकारी र केन्द्रीय कमिटी चयनमा प्रमुख भूमिका खेलेका बस्नेतकै कर्णाली प्रदेशका नेताहरु समेत यसमा असन्तुष्ट रहेका हुन् ।

उनकै गृह जिल्ला जाजरकोटका वाईसिएल ईन्चार्ज रहेका विकास रोकाय लगायत कर्णालीका अन्य जिल्ला इन्चार्जहरु समेत असन्तुष्ट रहेको सोमबार विज्ञप्तिमार्फत जानकारी दिएका छन् ।

यो पनि पढ्नुस्

वाईसिएलमा मनोमानी ढंगले पदाधिकारी चयन गरिएको भन्दै ६ जिल्ला इन्चार्जको असहमति (विज्ञप्तिसहित)

कर्णालीका ६ जिल्ला ईन्चार्जहरुले सामूहिक रुपमै विज्ञप्ति जारी गर्दै नवगठित कमिटीप्रति असहमति व्यक्त गरेका थिए । असहमति प्रकट गर्नेहरुमा रोकाय सहित जनककुमार विश्वकर्मा (रुकुम पश्चिम), हस्तबहादुर शाही(कालिकोट), हर्क थापा (दैलेख), कर्मा लामा(हुम्ला) छन् । केन्द्रीय सदस्यहरू गौरीकला शाही, गीता शाही र राजेश बुढा रहेका छन् ।

यसैबीच वाईसिएलको विवाद बढ्दै जाँदा नेता रामप्रसाद सापकोटाले पार्टीका उपमहासचिव जनार्दन शर्मा विरुद्ध चुनाव लड्ने चेतावनी दिएका छन् । वाईसिएलको इन्चार्ज समेत रहेका सापकोटाले वाइसिएलमा पदाधिकारी संख्या बढाएको भन्दै उपमहासचिव शर्माका भाई अनिलले फेसबुकमा पोष्ट गरेपछि त्यसमा प्रतिक्रिया जनाउँदै यस्तो चेतावनी दिएका हुन् ।
 
वाईसिएलमा विधान विपरीत पदाधिकारी र केन्द्रीय कमिटी चयन गरेको भन्दै अनिलले सामाजिक सञ्जालमा असन्तुष्टि प्रकट गरेका थिए । त्यही स्टाटसमा कमेण्ट गर्दै सापकोटाले उपमहासचिव शर्मा नै वाईसिएलको निर्वाचन गराउन नहुने पक्षमा लागेको भन्दै उनका भाई अनिलमाथि खनिएका हुन् ।

यो पनि पढ्नुस्

वाईसिएलको तेस्रो राष्ट्रिय सम्मेलनः निर्वाचन प्रक्रिया सुरु नहुँदै प्रचण्ड पक्षले धाँधली गरेको आरोप, जनार्दन पक्षको आपत्ति

शर्माका भाइ अनिलले लेखेका छन् ,‘विधान पास गरेको केहि घण्टा बित्न नपाउदै सम्मेलनको सर्बोच्चतालाई हरन गर्ने र आफ्नो असक्षमतालाई ढाकछोप गर्ने प्रबृतिले yclलाई पनि बन्दक बनायरै छोडे । यसमा ycl को खासै दोस छैन त्यसको जिम्मा लिने र पार्टीको नेतृत्वको कारण कति भिक्टिम भय त्यो त इतिहासको गर्भ मै रहला । जे जसरी होस एउटा कमिटी बनेको छ कमरेड पुष्प वली नेतृत्वको वाईसिएलनेपाललाई बधाई सहित सफल कार्यकालको शुभकामना ब्यक्त गर्दछु ।’

त्यसमा प्रतिक्रिया दिँदै सापकोटाले लेखेका छन्, ‘अनिल जि फ्याक्सर्नको हिसाबले म त चुनाबमा लैजाने तयारीमा थिए । (नाताले तपाईको दाई) आदरणिय नेता जनार्दन शर्माले पार्टी पदाधिकारी बैठक र अध्यक्षसॅग वाईसिएलजस्तो संगठनलाई चुनाब लैजानुहुन्न भनि सहमति कुरा आएको छ । खास के हो रु अनि तपाईहरूको पक्षले खुमलटार पुगेर गरेका अन्य सहमतिबारे मलाई केहि जानकारी कसैले गराईदिए हुने हो, मैले घुईरो-घुईरो सुनेको मात्रै छु । ycl मा घुनपुतलि नलागेपछि तपाई र अन्य आसेपासेले आजबाट सुरू गरेको प्रचार निन्दनिय छ । यस्ता पानिमरूवा चाल चल्न छोडेर साच्चै लड्न आए हुन्छ । म माओवादीमा तपाईका दाई जहॅा लड्छन् त्यहि चुनाब लड्न तयार छु ।’